Gran Premiu d'Italia

Gran Premiu d'Italia
Xeneral
Tipu de competición	actividá deportiva periódica
Deporte	deporte de motor
País	Italia
Organizador	Fédération Internationale de l'Automobile
Historia
Fundación	1921
Competición
Periodicidá	Cada añu
Web oficial

El Gran Premiu d'Italia ye una carrera d'automovilismu de velocidá apostada con monoplaces n'Italia. Ye una de les carreres de Gran Premiu más antigües, cola so primer edición apostada nel añu 1921. El Gran Premiu d'Italia forma parte de la Fórmula 1 dende'l so entamu en 1950 siendo la tercer pista de carrera permanente na esistencia de la Fórmula 1 y, xunto col Gran Premiu de Gran Bretaña, son los únicos que tuvieron nel calendariu tolos años.

Toes salvu cinco ediciones del Gran Premiu d'Italia corriéronse en Monza, un autódromu construyíu en 1922 específicamente p'allugar la carrera. Na carrera de 1923, participó Harry A. Miller col so automóvil "American Miller 122" remanáu pol conde Louis Zborowski, fechu famosu na película Chitty Chitty Bang Bang.

En Monza viéronse dalgunes de les meyores carreres de tolos tiempos, pero coles mesmes, tamién dalgunos de los peores accidentes d'esti deporte.^[1]

El circuitu orixinal consistía nun óvalu de 4,5 km y un circuitu mistu d'alta velocidá de 5,5 km, que compartíen la recta principal y utilizábense combinaos por aciu una ponte. En 1962, la Fórmula 1 dexó d'utilizar la seición oval y pasó a apostar el Gran Premiu d'Italia nel circuitu mistu de 5,8 km, al que se-y fueron amestando chicanes. Sicasí, el trazáu siguió siendo de los más rápidos del calendariu de la Fórmula 1; el colombianu Juan Pablo Montoya ostenta'l récor de vuelta con un tiempu de 1'19.525 realizáu nel añu 2004, superando los 262 km/h de velocidá media.

1. ↑ [1]